MASANJA ANASWA AKIHUBIRI INJILI KITAANI

HII NI MOJA YA VIDEO YA MAHUBIRI YAKE

MUIGIZAJI ‘Brazameni’ wa kundi la Orijino Komedi, Emmanuel Mgaya ‘Masanja Mkandamizaji’ (pichani) Aprili 17 mwaka huu alibambwa nje ya Uwanja wa Karume, Ilala jijini Dar es Salaam akihubiri Injili laivu na Askofu wake Bruno Mwakibolwa, Risasi Mchanganyiko lina ripoti kamili.

Tukio hilo la aina yake lilinaswa na paparazi wetu pande hizo ambako kulikuwa na mahubiri ya kufikikisha ujumbe kwa waumini waliokuwa wakipita katika eneo hilo.
Msanii huyo alionekana akiwa mstari wa mbele na kuwafanya baadhi ya wapita njia kuacha shughuli zao na kusogea eneo hilo kusikiliza neno alilokuwa akilitoa.

Askofu Mwakibolwa, alisikika akimnadi Masanja kuwa ni mchungaji mtarajiwa na kuwataka watu wajue neno la Mungu lina nguvu kubwa na kwamba yeyote anaweza kuwa nabii endapo ataliamini na kulifikisha kwa wakati husika.

“Ndugu zangu naomba muelewe kuwa Masanja kwa sasa ni mtumishi wa Mungu na hapa tumetoka naye kubatiza baadhi ya waumini wa dhehebu letu kwa hiyo ni mchungaji mtarajiwa ambaye atasimikwa hivi karibuni,” alisema Askofu Mwakibolwa.

Askofu huyo aliwaomba wote wanaomwamini Mungu kuamini maneno yake, kwani anamtegemea Masanja na anajua atakuja kuwa mtumishi mwenye nguvu nyingi na mwenye mvuto kwa watakatifu.

Kwa upande wake, Masanja alikiri kuuwania uchungaji na katika mahubiri yake kila mara alikuwa akisisitiza neno hilo na kuwaomba watu wote walikuwa hapo nao waokoke na kuwa kama yeye.

“Najua wengi wenu hamuamini kama mimi ni mchungaji mtarajiwa pamoja na kuambiwa na askofu wangu, najua kupitia injili na maneno yangu haya siku si nyingi nitasimikwa na kuwa mchungaji na mtumishi halali wa Mungu,” alisema Masanja.

Masanja ni muumini wa Kanisa la EAGT, Mito ya Baraka lililopo Kariakoo, Mtaa wa Jangwani karibu na jengo la Klabu ya Yanga ya jijini Dar, ambalo liko chini ya Askofu Bruno Mwakibolwa.

Awali Masanja alianza kuamini katika kanisa hilo kama mwanakwaya na baadaye alivutiwa na mahubiri na kuanza kuhubiri kwa njia ya nyimbo ambapo alitunga nyimbo kadhaa na kuziimba kanisani hapo.