AY NA MWANADADA STL NDANI YA COLLABO MOJA USIKU HUU

Usiku huu msanii AY kutoka Bongo na msanii Stella Mwangi aka STL kutoka Kenya wanatengeneza bonge moja la hit song. STL amekuja Bongo kwa kazi moja tu na msanii AY na akimaliza atarudi zake Kenya, wimbo huo unapikwa katika studio ya Lamar ikijulikana kama Fish Crab, AY amesema jina la wimbo kama bado halijapatikana ila utasound kama Mauaji ya Kutisha.

STL & AY

MBUNGE WA WAWI, HAMAD RASHIDI MOHAMMED AIVIMBISHIA MSULI CAFU

MBUNGE wa Wawi, Hamad Rashid Mohammed (CUF) ameigomea Kamati ya Nidhamu na Maadili ya chama hicho kumhoji na kumjadili kuhusu tuhuma zinazomkabili za kukiuka Katiba, akidai hana imani na wajumbe wake.

Pia ameigomea kwa kudai kuwa tayari alishafahamu kwamba Kamati hiyo ilikuwa na maamuzi ya kumfukuza uanachama, kupitia barua pepe aliyoinasa ikitoka kwa Katibu wa chama hicho, Maalim Seif Sharif Hamad kwenda kwa Mwenyekiti Profesa Ibrahim Lipumba.

Akizungumza na waandishi wa habari Dar es Salaam jana, Mh Hamad ambaye pia ni Mjumbe wa Baraza Kuu la CUF alisema alipokea barua ya kuitwa kuhojiwa kwa tuhuma za kwenda kinyume cha Katiba ya CUF, Desemba 23, mwaka huu na kikao hicho kilifanyika rasmi jana.

Alisema baada ya kuhudhuria kikao hicho, alilazimika kukigomea kuendelea kumjadili kutokana na kutokuwakubali wajumbe watano kati ya wanane akiwemo Mwenyekiti wa Kamati hiyo ambaye ni Makamu Mwenyekiti wa CUF, Machano Khamis Ali na Katibu wake Hamis Hassan.

Alisema viongozi hao wawili amewakataa kutokana na ushiriki wao katika kumtuhumu. Alisema hana imani na Machano baada ya kiongozi huyo kuahidi kumshughulikia katika kikao kilichofanyika hivi karibuni bila ya kumpa nafasi ya kusikiliza upande wake.

Aidha, kwa upande wa Hassan, Hamad alisema Katibu huyo alimtuhumu kwa kumuandikia Lipumba barua na kumtuhumu kuwa (yeye) ni chachu ya kuchafuka kwa hali ya kisiasa ndani ya chama na kwamba pamoja na washirika wake, wamekuwa wakifanya mbinu za chini kwa chini kumuondoa Lipumba kwenye nafasi yake.

Alisema pia katika Katiba ya CUF hakuna kipengele chochote kinachozungumzia Kamati ya Nidhamu na maadili hivyo alikuwa na sababu ya kuikataa Kamati hiyo.

Pamoja na hayo, pia alisema sababu iliyomfanya aigomee Kamati hiyo ni baada ya kufahamu kuwa tayari wajumbe wake walikuwa na uamuzi wa kumfukuza uanachama kupitia barua pepe ya Maalim Seif kwenda kwa Lipumba.

Aliinukuu barua pepe hiyo ambayo ilisema “Nimeshauriana na Makamu tumeona kuna ahadi ya jamaa yako (Hamad) na genge lake kuitwa kwenye Kamati ya Nidhamu kuhojiwa, ushahidi wa kutosha umekusanywa dhidi yake…Kamati hiyo italeta taarifa kwa Kamati Kuu ya Taifa.

“Kamati Kuu ya Taifa ifanye uamuzi mgumu wa kuwasimamisha uongozi vinara wao na wengine kupewa karipio, Kamati hiyo ifikishe taarifa yake katika kikao kitakachofanyika Februari mwakani... muono wetu tumfukuze kwenye chama na akienda mahakamani, ikitoa uamuzi wa kumpendelea, mwache awe Mbunge wa Mahakama kama akina Asha Ngede na Naila Majid,” Hamad alinukuu barua pepe hiyo.

Aidha, alisema katika barua pepe hiyo, Maalim Seif alimshauri Lipumba kuwa ikiwezekana na Hamad Rashid aachwe hata akienda Chadema, CCM au aendelee na urafiki wake na Mbunge wa Monduli, Edward Lowassa.

“Jamani hii ni dhambi kubwa anayoifanya Maalim Seif, mimi namheshimu sana na ndio maana nataka ajipime mwenyewe kwani haya ndio yaliyomfanya Jumbe ajiuzulu,” alidai mwanasiasa huyo mkongwe.

Alisema hana ukaribu wowote na Lowassa zaidi ya kusalimiana kawaida kama watu wengine. Alisema amezushiwa mambo mengi, ameitwa muasi na anataka kukibomoa chama, wakati amekuwa kiungo muhimu baina ya Wazanzibari na Wabara ndani ya CUF.

Aidha, alisema amesaidia kampeni hadi ya Lipumba wakati wa uchaguzi na kufadhili baadhi ya wabunge tofauti na Maalim Seif, aliyedai hajawahi hata kufungua mkutano mmoja wa chama Bara.

“Namuomba Maalim Seif kwa hali iliyofikia kama anataka kujisafisha na kuheshimika, basi afuate nyendo za aliyekuwa Rais wa Afrika Kusini Nelson Mandela na Baba wa Taifa hayati Mwalimu Julius Nyerere,” alisema.

Alisema hali ya chama hicho ni tete kwa kuwa hakiendeshwi kwa haki na mambo mengi ya kusingiziana na kuzushiana huku fedha nyingi zikitumika bila maelezo na iwapo watu wakihoji wanaitwa waasi.

Alihoji inakuwaje chama hicho kimekaa zaidi ya miaka mitatu na CCM kujadili muafaka wa Zanzibar na kushindwa kukaa hata kikao kimoja kujadili na kufikia muafaka kuhusu mgogoro unaoendelea.

Naye mjumbe wa Halmashauri Kuu ya chama hicho, Doyo Hassan Doyo, alisema wanachokitaka kwa sasa ni kukirejesha chama hicho katika hali inayokubalika kwa pande zote Bara na Visiwani ikiwemo kuhakikisha fedha za ruzuku za chama zinafikia maeneo yote.

“Sisi tunapata kwa mwezi Sh milioni 124 na michango ya fedha za wabunge takribani Sh milioni 60, jumla ni Sh milioni 190 hadi 200 lakini fedha hizi zinaishia makao makuu, huko wilayani watu wanazisikia tu, tukihoji tunaitwa waasi,” alidai Doyo.

Kwa sasa sakata hilo, baada ya Hamad Rashid kuigomea Kamati ya Nidhamu na Maadili linasubiri kuwasilishwa wakati wowote mbele ya Baraza Kuu la CUF kwa majadiliano zaidi.

Chanzo: HABARI LEO

MKESHA WA KULIOMBEA TAIFA KUFANYIKA UWANJA WA TAIFA DESEMBA 31 MWAKA HUU

MKESHA WA KULIOMBEA TAIFA KUFANYIKA UWANJA WA TAIFA DESEMBA 31 MWAKA HUU

Umoja wa makanisa ya Kikiristo Tanzania (Tanzania ChristianFellowship of Churches) umeandaa mkesha mkubwa kwa ajili ya dua maalum kwa taifa kwa lengo la kumshukuru Mungu kwa kulivusha taifa katika kipindi cha miaka 50 ya uhuru na kuanza kipindi kingine ambapo mgeni rasmi katika mkesha huo atakuwa rais wa Jamhuri ya Muungano wa Tanzania.

Akizungumza na waandishi wa habari leo jijini Dar es salaam, mwenyekiti wa kamati ya maandalizi ya Mkesha mkuu kutoka Tanzania Christian Fellowship of Chrches Askofu Godfrey Emmmanuel Malasi amesema watanzania wanapaswa kujua Mungu anakusudi gani na taifa la Tanzania katika kipindi hiki ambacho Taifa limetimiza miaka 50 ya uhuru na kuanza kipindi kingine na kutoa wito kwa kila mtanzania kufanya kazi kwa bidii na kushiriki katika uchumi wa taifa.

Amesema serikali inazo sera nzuri za kuweza kuwamilikisha wananchi rasilimali ziliizopo nchini ili waweze kuishi maisha bora na kuongeza kuwa wananchi wanapaswa kutambua majira na wakati uliopo sasa wakati taifa linapoanza miaka 50 mingine ya uhuru kwa kuzitumia fursa zilizopo kujiletea maendeleo.

“Kila mmoja anapaswa kushiriki na kushirikishwa kikamilifu katika uchumi wa taifa letu ambalo sasa limemaliza miaka 50 ya uhuru, kila mtu anapaswa kutambua nafasi yake, tusikae kwa kubweteka, tusikae kwa kulalamika kila mtu ajue ni wakati wa kumiki na kurithishwa rasilimali zilizopo katika taifa hili”

Amesema mwaka huu dua maalum kwa taifa litafanyika katika mikoa 14 ya Tanzania ikiwemo Dar es salaam, Arusha, Mwanza,Kilimanjaro, Singida Iringa, Mbeya ,Iringa, Kagera, Dodoma, Ruvuma, Tabora,Tanga na visiwa vya Zanzbar na Pemba.

Amefafanua kuwa katika mkesha huo viongozi mbalimbali wa taifa ,vyama vya siasa na balozi mbalimbali zipatazo 37 zilizopo nchini zimearikwa kushiriki mkesha huo na kuongeza kuwa tayari baadhi ya balozi zimethibitisha kushiriki mkesha huo.

Kuhusu maadalizi ya mkesha huo askofu Godfrey Malasi amesema yanaendelea vizuri na kutoa wito kwa wananchi kujitokeza kwa wingi katika dua hiyo maalum na kuongeza kuwa mkesha huo utaambatana na tukio maalum la watoto 50 kusimama uwanjani na kutamka maneno ya kupokea miaka 50 ijayo ikiwa ni ishara ya kupokea kizazi huru cha watanzania.

Kwa upande wake makamu mwenyekiti wa kamati ya mkesha mkuu wa Taifa Askofu Keneth Damas ameipongeza serikali kwa kuwa na msimamo wa kupinga suala la ndoa za jinsia moja (ushoga) katika mikutano ya kimataifa iliyofanyika hivi karibuni na kuuita uamuzi huo kuwa ni ushindi mkubwa kwa taifa la Tanzania na watu wake katika kuheshimu utu na utamaduni wa taifa na uukataaji wa vitendo vya udhalilishaji na kuongeza kuwa wao kama viongozi wa dini wataendelea kuonya na kufundisha watu wajue athari za dhambi hiyo.

“Sisi kama viongozi wa makanisa katika nchi hii tunapinga kwa nguzu zote vitendo vya ushoga ndani ya taifa letu, vitendo vya ushoga ndivyo vilivyosababisha Sodoma na Gomora kuchomwa moto kwa kuwa vilimchukiza sana Mungu, Sisi kama viongozi wa dini katika kizazi chetu na vizazi vijavyo hatutaki kufikia hapo na kuona taifa letu likichomwa moto”
Habari: Aron Msigwa/MAELEZO

KAFULILA KUENDELEA NA UBUNGE FEBRUARI 2012

KAFULILA KUENDELEA NA UBUNGE FEBRUARI 2012

Kafulila, akichangia mjadala Bungeni hivi karibuni

MAHAKAMA Kuu Dar es Salaam, imeamuru Mbunge wa Kigoma Kusini (NCCR-Mageuzi), David Kafulila, kuendelea na wadhifa wake wa ubunge hadi hapo kesi yake ya msingi itakaposikilizwa

Hivi karibuni, Halmashauri Kuu ya NCCR-Mageuzi, ilimfukuza Kafulila uanachama, uamuzi ambao unamuondolea sifa ya kuwa mbunge.
Hata hivyo, kutokana na uamuzi wa Mahakama Kuu leo, Kafulila ataendelea kushikilia nafasi yake ya ubunge mpaka hapo kesi ya msingi itakaposikilizwa na kutolewa hukumu.
Uamuzi huo wa mahakama, umefuatia kesi iliyofunguliwa na Kafulila, kupinga uamuzi wa Halmashauri Kuu ya NCCR-Mageuzi wa kumvua uanachama na kumuondolea sifa ya kuendelea kuwa mbunge.
Kafulila alipozungumza na mwandishi wetu alisema kuwa Mahakama Kuu itakaa Februari mwakani na kupanga kuanza kusikiliza kesi hiyo.
“Namshukuru Mungu, siku zote Mungu yupo pamoja na wanyonge. Bado nasimamia ukweli kwamba kikao cha Halmashauri Kuu ya NCCR-Mageuzi kilichoamua, kilikiuka sheria na taratibu. Hata hivyo, suala hili lipo mahakamani, tuache mahakama itaamua,” alisema Kafulila.
Mbunge wa Kigoma Kaskazini (Chadema), Zitto Kabwe, amepongeza uamuzi wa mahakama na kueleza kwamba ni mpango wa Mungu kumtetea mnyonge.
Zitto, aliandika kwenye ukurasa wake wa mtandao wa Kijamii, Facebook leo saa 9:40 alasiri: “Kafulila kuendelea na ubunge. Mahakama Kuu imetoa amri muda mfupi uliopita. Ataendelea kuwa mbunge mpaka hapo kesi ya msingi itakapokwisha. Mungu yupo pamoja na wanyonge.
Na Sufianimafoto Blog

MADIWANI FUATILIENI MIRADI YA MAENDELEO

MADIWANI FUATILIENI MIRADI YA MAENDELEO

Na Gladness Mushi, ARUSHA

Mkuu wa Mkoa wa Arusha Bw. Magesa Mulongo,amesema kuwa kama madiwani kutoka katika kata zote watashiriki katika kusimamia miradi mbalimbali ya maendeleo ya vijiji na kata basi miradi hiyo itaweza kujengwa katika viwango vya hali ya juu sana na pia itaweza kuwanufaisha zaidi wananchi ambao ndio walengwa wa miradi hiyo.

Bw Magesa aliyasema hayo hivi karibuni mkoani Arusha wakati akiongea na viongozi mbalimbali wa serikali za mitaa kuhusu masuala na mikakati mbalimbali ya kimaendeleo kwa Mkoa wa Arusha.

Amesema,ili miradi iboreshwe kwa kiwango ambacho kinakubalika ni lazima kuwe na mipango mahususi kwa viongozi wa serikali hizo hasa Madiwani ambapo wanatakiwa kuhakikisha kuwa wanakuwa wasimamizi wazuri wa miradi ambayo inalenga kutoa huduma kwa jamii.

Alisema kwa utaratibu huo wa kufuatilia na kukagua mara kwa mara shuguli za miradi hiyo ya maendeleo katika ngazi ya kata unawezekana kufanyika na kuwa na manufaa kwa wananchi ambapo ufuatiliaji huo unaweza kuungwa mkono hata na ngazi ya halmashauri.

Alibainisha kuwa ni wazi miradi mbalimbali katika ngazi za kata,Vijiji,zinashindwa kukamilika na kuwafikia watumiaji ambao ndio waliolengwa, kwa kuwa bado baadhi ya watendaji wanashindwa kufuatilia kwa ukaribu miradi hiyo hali ambayo inasababisha hasara kubwa sana kwa Serikali, na Wahisani mbalimbali.

“Nawasihi sana Madiwani hakikisheni kuwa mnajua na kufuatalia miradi yote ambayo imo kule kwenye kata zenu hata kama miradi hiyo si ya Serikali kwa kuwa malengo halisi ya miradi hiyo ni kumkomboa Mtanzania”alisema bw Magesa.

Akizungumzia suala la usimamizi wa Fedha alisema kuwa nao maafisa mipango wanatakiwa kuhakikisha na kukagua ubora wa mradi kabla hawajapitisha malipo mbalimbali kwa ajili ya miradi hiyo kwa kuwa baadhi ya miradi inapitishwa na halmashauri wakati miradi hiyo haina ubora uliokusudiwa.

“Eti unakuta mkuu wa idara anakaa ofisini alafu anapitisha malipo

kwa ajili ya miradi wakati hajui hata mradi ulipo,wala ubora wake sasa watu wa hali hii mimi sitawaacha kabisa na badala yake nawasihi sana madiwani kuwa hakikisheni kabla hamjapitisha mradi mnashirikiaana na halmashauri zenu hata kwa njia ya ushauri wa wataalamu wake’aliongeza Bw Magesa.

Aliwataka wakuu wa idara kuhakikisha kuwa wanashirikiana na uongozi mbalimbali wa serikali za vijiji katika kuboresha na kuimarisha miradi ya Serikali pamoja na Miradi ya wahisani ili kuharakisha maendeleo kwa walengwa hasa katika maeneo ya vijijini.

Habari/Picha: Fullshangwe Blog

WATANZANIA TUENDELEE KUWACHANGIA WAATHIRIKA WA MAFURIKO

WATANZANIA TUENDELEE KUWACHANGIA WAATHIRIKA WA MAFURIKO

Ndugu zetu waliopatwa na janga la mafuriko bado wanahitaji misaada yetu kwa hali na mali, tafadhal ewe Mtanzania endelea kuwachangia kwa Kupitia nambari ya Red Alert 15599,mteja anaweza kuchangia shilingi 500 kwa kutuma ujumbe mfupi – SMS wenye neno MAAFA na hakuna ukomo wa ujumbe na kwa njia ya m-pesa mteja anaweza kuchangia kuanzia shilingi 1,000 na zaidi kwenda nambari 155990.

JINSI YA KUCHANGIA KUPITIA M-PESA

*150*00# kupata orodha ya huduma za m-pesa.

Hatua ya 2: Chagua 4 – Lipa Bili

Hatua ya 3: Weka namba ya kampuni – weka namba 155990

Hatua ya 4: Weka namba ya kumbukumbu – weka namba yako ya simu

Hatua ya 5: Weka kiasi – ni kuanzia Tsh 1,000 na kuendelea

Hatua ya 6: Weka namba yako ya siri

Hatua ya 7: onyeza 1 kwa kuhakikisha muamala na tayari utakuwa umeshachangia.

TWANGA PEPE WALIVYOPAGAWISHA X-MASRapa machachari wa Bendi ya African Stars International 'Twanga Pepeta', Msafiri Diouf akikamua mbele ya mashabiki zake katika shoo maalum ya sikukuu ya Krismasi iliyofanyika usiku wa kuamkia leo ndani ya Ukumbi wa Mango Garden Kinondoni jijini Dar es Salaam.
Mpiga Dramu mkuu wa bendi hiyo, James Kibosho akiwajibika kwenye onesho hilo.
Mpiga solo mkongwe wa bendi hiyo Miraji Shakashia 'Shaka Zoru' (kushoto), akipiga gitaa huku akiunda pozi na shabiki wake namna hiyo.
Staa wa bendi hiyo Charles Gabriel 'Chalz Baba' (kulia mbele), akicheza kwa pamoja na wanenguaji wa bendi hiyo.
Muimbaji machachari wa bendi hiyo Dogo Rama, akicheza kwa staili yake huku akiwa amembeba mmoja wa wanenguaji wa bendi hiyo Mary Hamisi.
Dogo Rama akikatika kwa staili yake na Maria Soloma.
Mnenguaji wa Bendi hiyo Asha Saidi 'Sharapova' akiwajibika mbele ya mashabiki zake.
Wanenguaji wa kiume wa bendi hiyo wakiwajibika jukwaani hapo.
Baadhi ya mashabiki wa bendi hiyo wakishuhudia kwa makini zaidi burudani zilizokuwa zikitolewa Ukumbini hapo.